Wararka ka imanaya gobolka Mudug ee bartamaha dalka Soomaaliya ayaa sheegaya dagaal culus oo saaka ka qarxay bariga magaalada Gaalkacayo, halkaas oo ay ku hardamayaan labo maleeshiyo oo kala taabacsan maamullada riddada ee Muqdisho iyo Garoowe.
Sida ay xogtu tibaaxayso, dagaalkan ayaa bilowday kadib markii maleeshiyaadka daacadda u ah madaxa maamulka Puntland, Saciid Cabdullaahi Deni ay saaka weerareen fariisinno ay maleeshiyaadka PSF ee hoos-taga maamulka Gurguurte ka samaysteen bariga magaalada Gaalkacayo.
Goob-joogayaal ayaa sheegay in labada dhinac ay isku adeegsadeen hubka noocyadiisa kala duwan, oo ay ku jiraan hoobiyeyaal, iyadoo tiro madaafiic ah lasoo wariyey inay ku hoobteen gudaha xaafado ka tirsan magaalada Gaalkacayo.
Maleeshiyaadka Puntland ayaa la xaqiijiyey inay gudaha u galeen isla markaana ay si buuxda ula wareegeen gacan-ku-heynta xero ciidan oo duleedka magaalada ay ku lahaayeen maleeshiyaadka PSF ee daacadda u ah Xasan Gurguurte.
Ilo-wareedyo ayaa sheegaya in maleeshiyaadka Puntland nolosha ku qabteen askar iyo saraakiil ka tirsan maleeshiyaadka PSF, isla markaana ay gebi ahaanba la wareegeen saanad millateri iyo gaadiid dagaal oo yaallay gudaha xeradaasi.
Baraha bulshada waxaa si weyn ugu faafay muuqaallo muujinaya maleeshiyaadka Saciid Deni oo ku sugan xerada maleeshiyaadka PSF iyo sidoo kale la arkayo hub iyo baabuur Cabdi Bileyaal ah oo xeradaasi dhex yaalla.
Taliska booliska ee maamulka Puntland ayaa warsaxaafadeed ay soo saareen ku sheegay in hawl-gal amni oo maanta ay ka fuliyeen Gaalkacyo ku beegsadeen goobo ay sheegeen in maleeshiyaad hubaysani ay ku sugnaayeen, iyagoo intaa ku daray in hawl-galku uu weli socdo.
Waxa kale oo bayaanka lagu sheegay in maamulka Puntland uusan marnaba u dulqaadan doonin isla markaana uu tallaabo adag ka qaadi doono koox ama shaqsi kasta oo u adeegaya wax ay ku tilmaameen cadowga Puntland.
Qaar ka mida shacabka magaalada Gaalkacayo ee maleeshiyaadkani ay ku kor dagaallameen ayaa lasoo wariyey in waxyeello soo gaartay, isla markaana ay burbureen qaar ka mida guryaha shacabka oo ay ku dhaceen tiro hoobiyeyaal ah.
Dagaalkan ayaa salka ku haya khilaafka xooggan ee ka dhex aloosan maamullada riddada ee Muqdisho iyo Garoowe, iyadoo maalmihii lasoo dhaafay Xasan Sheekh Maxamuud uu saanad fara badan oo hub ah ku daabulayay magaalada Gaalkacayo.
About The Author
