Dagaal culus ayaa maalintii saddexaad ka socda bartamaha magaalada Boorama ee xarunta gobolka Awdal, kaas oo u dhaxeeya shacabka ku dhaqan deggaankaasi iyo maleeshiyaadka ashahaado-la-dirirka Somaliland oo maalmahan u dambeeyey xasuuq ba’an ka geystay deggaannadaasi.
Sida ay wararku tibaaxayaan iska hor-imaadkan saaka dhacay ayaa bilawday kadib markii maleeshiyaadka Riddada Somaliland ay isku dayeen in ay rartaan lacagtii taallay baanka dhexe ee Boorama, tallaabadaas oo shacabku ay ka dhiidhiyeen, si adag-na uga hor-tageen.
Dagaal culus ayaa mar kale qarxay halkaasi, waxaana sida aanu xogta ku helnay maleeshiyaadka Somaliland ay dadkii shacabka ahaa ee halkaasi isugu soo xoomay oodda kaga qaadeen rasaas culus oo ka dhacaysay hubka noocyadiisa kala duwan.
Ilo-wareedyo ayaa sheegaya in ugu yaraan 1 qof oo shacab ah uu ku dhintay, 4 kalena ay ku dhaawacmeen rasaastaasi aan loo aabbo-yeellin ee maleeshiyaadka Riddadu ay sida arxan-darrada ah u huwiyeen shacabka Boorama.
Xaaladdu weli waa mid kacsan, waxaana socda bannaan-baxyo waaweyn oo ka dhan ah maamulka Riddada Somaliland, iyadoo dhanka kalena ay si isdab-joog ah isaga soo daba-dhacayaan baaqyada wax-garadka ee ku talinaya in hubka la qaato oo la iska dhiciyo maleeshiyaadka Riddada.
Gummaadkan maanta dhacay ayaa imanaya iyadoo saacadihii lasoo dhaafay uu mid ka mida salaadiinta Boorama oo ku hadlayay afka odayaasha dhaqanka ee gobolka Awdal oo lagu magacaabo Suldaan Dhawal uu shaaciyey in ku dhawaad 100 qof oo shacab ah ay dhimasho iyo dhaawac ku noqdeen xasuuqqa ay magaalada Boorama ka wadaan maleeshiyaadka ashahaado-la-dirira Somaliland.
About The Author
