Dalalka Masar iyo Eratariya ayaa sii xoojinaya xiriirkooda, kaddib booqashadii uu Madaxweynaha Eratariya Isaias Afwerki uu bishii hore ku tagay caasimadda waddankaasi ee Qaahira.
Wasiirka Arrimaha Dibadda Erateriya, Cismaan Saalax, iyo dhiggiisa Masar, Badar Cabdulcaati, ayaa Axaddii shalay ku kulmay magaalada Qaahira, halkaas oo la sheegay inay kaga wada hadleen adkeynta wax ay ku tilmaameen iskaashiga taariikhiga ah ee labada dal.
Sida ay xogtu tibaaxayso kulanka ayaa sidoo kale diiradda lagu saaray xaaladaha ka aloosan Geeska Afrika iyo isu-duwidda mowqifyada labada dal ee la xiriira arrimaha gobolka.
Labada wasiir oo u duur-xulaya Itoobiya ayaa la sheegay inay carrabka ku adkeeyeen in amniga iyo maamulka Badda Cas ay yihiin mas’uuliyad u gaar ah dalalka ku teedsan xeebaha badda.
Masar iyo Erateriya ayaa muddooyinkii dambe si isku mid ah uga soo horjeeday damaca gurracan ee bad-raadiska ah ee Itoobiya ku doonayso marin-badeed ay ka xayuubsato dalalka jaarka.
Bishii Shanaad ee sanadkan 2026, Wasaaradda Arrimaha Dibadda Itoobiya waxay Masar ku eedeysay inay isku dayeyso inay go’doomiso Itoobiya, iyadoo RW Abiy Axmed hore u sheegay in dalkiisu uusan sii ahaan doonin maxbuus juqraafiyeed.
Warsaxaafadeed kasoo baxay Asmara ayaa lagu sheegay in kuklan uu Wasiirka Khaarajiga Erateriya isla Qaahira kula yeeshay la-taliyaha Trump ee arrimaha carabta iyo Afrika, Mascad Buulas, looga hadlay arrimo la xiriira gobolka iyo xoojinta xiriirka Asmara iyo Washington.
About The Author
