Sida uu ku sheegay wargeyska Ash-sharqul Awsat, waxaa weli socda warar la isla dhex-marayo oo ku saabsan suurtagalnimada in maamulka Yahuuddu uu saldhig millateri ka samaysto dhulka uu ka arrimiyo maamulka ashahaado-la-dirirka Somaliland, iyadoo laga digay in tallaabadani ay sii hurin karto xiisadaha ka jira Geeska Afrika iyo Badda Cas.
Wararkii ugu dambeeyay ee la faafiyey waxay la xiriireen jiritaanka ciidan Sahaayino ah oo ku sugan deggaannada Somaliland. Inkastoo maamullada Hargeysa iyo Talaabiib ay arrintaasi ka hadleen, isla markaana ay beeniyeen.
Iyadoo arrimahaasi jiraan, haddana xogaha horudhaca ah ee soo baxay waxay muujinayaan inuu jiri karo qorshe Yahuuddu ay saldhig millateri uga samaysanayso Somaliland, iyadoo sidoo kalena la tijaabinayo mowqifyada dhinacyo kale oo gobolka ah, sida ay khubaro u sheegeen wargeyska Ash-sharqul Awsat.
Telefishanka Yahuudda ee i24 News ayaa soo xigtay warbixinno sheegaya in Somaliland ay Saahinada siisay xuquuq ay kaga hawl-geli karto xarun millateri oo dheeraad ah, taas oo loo adeegsan karo saadka iyo taageerada hawlgallada diyaaradaha duullimaadyada masaafada dheer.
Sidoo kale, mareegta Middle East Eye ayaa sheegtay in maamulka Sahaayinadu uu horaantii sannadkan ciidan tiradiisu kooban tahay uu geeyey Somaliland, taas oo qayb ka ah iskaashi amni oo sii kordhaya oo u dhexeeya labada dhinac.
Sida uu ka sanqariyey sarkaal la hadlay mareegtaas, ku dhowaad 50 askari oo Yahuudda Itoobiyaanka ah ayaa ku sugan gobolka, kaddib heshiisyo amni oo la sheegay in la gaaray kadib aqoonsigii uu Netanyahu ugu aqoonsaday Somaliland dal ka madaxbannaan Soomaailya inteeda kale.
Dhanka kale, Wasaaradda Arrimaha Dibadda ee maamulka Yahuudda ayaa qoraal kooban oo ay Isniintii lasoo dhaafay soo dhigtay barteeda xiriirka bulshada ee X (Twitter), ku beenisay warkaasi, iyadoo ku tilmaantay inuu yahay mid aan sax ahayn.
Wargeyska Ash-sharqul Awsat wuxuu tilmaamay in beenintani ay dhalisay dood badan, maadaama ay jireen hadallo rasmi ah oo Yahuuddu ay horey u sheegtay, kuwaas oo tilmaamaya in Sahaayinadu ay sanado badan hawl-gallo ka wadday gobolka.
Wasiirka Difaaca Yahuudda, Israel Katz, ayaa toddobaadkii hore, xilli uu qaabilayey madaxa maamulka Somailland ee Cirro waxa uusheegay in Yahuuddu ay sannado badan ka fulinaysay Somaliland hawlo uu ku tilmaamay kuwo qarsoodiya, sida ay werisay wakaaladda AFP.
Intii uu booqashada ku guda-jiray, Cirro ayaa wareysi uu siiyey i24 News ku sheegay inuusan meesha ka saari karin suurtagalnimada saldhig milatari oo mustaqbalka ay Yahuuddu ku yeelato Somaliland, isagoo intaas ku daray in arrintaasi ay dhici karto dhawaan.
Wargeysku waxa uu sheegay in CabdiKariim Saalax oo ah falanqeeye siyaasadeed oo kasoo jeeda Somaliland uu qabo in weli aan la saxiixin heshiis rasmi ah u dhexeeya Somaliland iyo Yahuudda oo ku saabsan dhismaha saldhig millateri, balse arrintaasi ay suurogal tahay mustaqbalka dhow.
Sidoo kale CabdiWeli Jaamac Barre oo ah falanqeeye siyaasadeed oo kasoo jeeda Soomaaliya ayaa wargeyska u sheegay in wararka la faafinayo iyo hadallada is-khilaafsan ee ku saabsan suurtagalnimada saldhig milatari oo Yahuuddu ku yeelato Somaliland ay sii kordhinayaan doodda iyo muranka gobolka, isla markaana ay xoojinayaan walaacyada laga qabo tallaabadaas.
Barre wuxuu arrintaas ku sababeeyey in jawaabaha laga bixiyey aysan ahayn kuwo gebi ahaanba albaabka u xiraya fikraddaasi. Sida uu sheegay, maamulka Somaliland ma bixin beenin cad oo kama dambays ah, balse wuxuu ka tagay suurtagalnimooyin mustaqbalka ah.
Waxa kale oo Barre uu tilmaamay inuu jiro iskaashi amni oo sii xoogaysanaya, iyadoo si rasmi ah loo qiray in maamulka Sahaayinadu uu tababar siiyo ciidamada ammaanka iyo kuwa millatariga ee maamulka ashahaado-la-dirirka Somaliland.
Sida uu sheegay Barre, goobta juqraafiyeed ee Somaliland oo ku taalla Gacanka Cadmeed una dhow marin-biyoodka muhiimka ah ee Bab el-Mandeb waxay ka dhigaysaa meel istaraatiijiya oo muhiim u ah joogitaan kasta oo millatari oo caalami ah, gaar ahaan midka Yahuudda.
Waxa uu intaas ku daray in beenintu aysan ka dhignayn in arrintu aanay dhici karin, isagoo ku doodday in beeninta hadda jirta laga yaabo inay tahay kaliya tallaabo hordhac ah oo lagu qiimaynayo falcelinta dhinacyada gobolka iyo kuwa tartanku uu ka dhaxeeyo.
Si kastaba, xogaha warbixinnadii caalamiga ahaa ee ugu dambeeyey waxay isku raaceen in maamullada Talaabiib iyo Washington ay saldhigyo millateri ka dhisteen gudaha garoonka diyaaradaha ee magaalada istaraatiijiga ah ee Berbera.
About The Author
