Saacadihii lasoo dhaafay waxaa magaalada caasimadda ah ee Muqdisho ka da’ay roobab xooggan oo muddo saacado ah da’ayay, kaasi oo dadku si wayn ugu diirsadeen, waxaa sidoo kale roobabkaas ka dhashay khasaare kala duwan oo isugu jira mid nafeed iyo mid hantiyeed.
Roobabka oo ahaa kuwa daadad wata ayaa saacado badan da’ayay sida ilo wareedyo magaalada ku sugan xaqiijiyeen, waxaa halkaas ka dhashay khasaare nafeed oo marba marka ka dambeysa sii kordhaya, waxaa dadka geeridooday ee la xaqiijiyay ka mid ahaa hooyo iyo canugeeda, kuwaas oo lasoo wariyay in uu ku dumay guri ay ka degganaayeen degmada Xamar Jajab ee magaalada Muqdisho.
Sidoo kale dadka qaar waxay wararku sheegayaan inay biyuhu la tageen, kuwaas oo lasoo wariyay in qaarkood goor dambe lasoo saaray maydadkooda, taasi oo sare usii qaadaysa maydadka, waxaa sidoo kale roobabkii xoogganaa ee ka da’ay caasimadda ka dhashay burbur hantiyeed.
Waddooyin muhiim ah ayaa burburay sida laga dheehan karo sawirro iyo muuqaallo lasoo tabiyay, meelaha ay sida wayn u saameeyeen daadadka waxaa ka mid ah degmada Howlwadaag ee gobolka Banaadir, waddooyinka qaar ayay biyuhu degeen oo kala xireen isku socodka dadka iyo gaadiidka, halka guryaha qaarna ay dumeen.
Meelaha ay daadadku saameeyeen waxaa sidoo kale ka mid ah, gigidda diyaaradaha ee magaalada Muqdisho, halaas oo ay biyo buux dhaafiyeen goobaha ugu muhiimsan, sida qeybta dadka lagu baaro, xarumaha shirkadaha, qeybta ay dadka musaafiriinta ah ku sugaan diyaaradaha iyo xafiisyo kale oo kuyaal garoonka.
Dadka ku dhaqan magaalada Muqdisho ayaa waxay eedeymo culus u jeediyeen kooxda Ridada, iyagoona ku eedeeyay inay ka qaado canshuuro xad dhaaf ah oo joogto ah, sidaas oo ay tahay na aysan waxba ugu qaban.
About The Author
