Gobolka Tigreega ee dhaca waqooyiga waddanka Itoobiya oo muddo laba sano ah ay ka socdeen colaado u dhaxeeyay ciidamada millatariga xabashida iyo kuwa deegaanka ayaa xilligan wajahaya xaalado aad u adag oo dhanka nolasha ah, xilli dadka kunool mandiqaddaasi ay u dhamaanayaan gaajada iyo macluusha.
Getachew Reda oo ah hoggaamiyaha ismaamulka Tigray ayaa sheegay in xaaladda imika ka taagan gobolkiisa ay tahay mid masiibo ah oo u dhiganta macluushii 1984-kii malaayiinta qof ku dishay gudaha waddanka Itoobiya.
Isagoo sii hadlayay ayuu tilmaamay in xaaladda gobolka ka jirta ay keentay in 91% shacabka Tigrayga ay soo wajahdo halis macaluul ah, taasi oo ah mid si xowli ah kusii fidaysa.
Reda ayaa xusay in kumanaan Tigray ah ay u dhinteen cunto la’aan tan iyo markii uu dhacay heshiiskii nabadeed ee ay Pretoria ku kala saxeexdeen dawlada Itoobiya iyo Jabhadda xoraynta dadka Tigray ee (TPLF) bishii Nofembar sannadkii 2022-kii.
Macluushan 91 boqolkiiba saamaysay shacabka gobolka Tigray ayaa loo aaneeyay burburkii ka dhashay dagaalladii Abiy Axmed iyo Reda ciidamadooda ku dhexmaray gobolka, taas oo keentay in ciidamada millatariga ay si isku mid ah u burburiyaan dhaqaalihii gobolka Tigray-ga iyo xarumaha caafimaadka sidoo kalena dhacaan hantida gaarka loo leeyahay iyo kuwa dadweynaha iyo inay si qasab ah u barakaciyaan in ka badan 1 milyan oo qof oo Tigray ah, taasi oo xaalad quus ah gelisay gobolkaasi sida laga soo xigtay hayadaha ka howlgala gobolkan.
About The Author
