Kulan uu buuq hareeyay oo ka dhacay magaalada Garoowe ee caasimadda gobolka Nugaal ahna magaalada madaxda maamulka Puntland ayaa waxaa ka dhashay in Rasaas kulanka ka dhex dhacday uu ku dhaawacmo Taliye kuxigeenkii Booliiska Puntland Konreel Bile Faarax Cabdi.
Taliye ku xigeenka waxay Xabadda kaga dhacday Jilibka, waxaana rasaasta uu ku dhaawacmay riday Taliyaha Booliiska Puntland ninka lagu magacaabo C/Qaadir Shire Faarax Ereg.
Ereg ayaa la murmay gudoomiyaha gobolka Nugaal ee maamulka Puntland Cumar Cabdullaahi Faraweyne, waxaana markii uu xanaaqay Taliyaha uu lasoo baxay Bastoolad uu watay, isagoona ku riday Gudoomiyaha, balse waxay haleeshay ku xigeenkiisa.
Kulankan oo looga hadlayay arimaha Amaanka kuna soo dhamaaday Fashil iyo dhiig daadasho waxaa goob joog ahaa Wasiirka Gaashandhiga maamulka Puntland, Taliyaha Booliiska, kuxigeenkiisa, madaxa la dagaalanka waxa loogu yeero Argagaxisada iyo saraakiil kale.
Arintan ayaa ah mid aad loola yaabay, waxaana aad u hadal haya shacabka magaalada Garoowe, kuwaas oo iswaydiinaya sababta ay ku dhacday in madaxdii ugu sarreysay ee Amaanka ka shaqeynayay ay iyaga dhexdooda is rasaaseeyaan.
Is rasaaseynta waxaa marar badan lagu yaqaanay Ciidamada dowladda iyo kuwa maamul goboleedyada oo u abaabulan qaab malleeshiyaad beeleed ah, waxaana hadda kusoo biiray madaxda sare, iyadoona loo aaneynayo arintan maandooriyaha sida xad dhaafka ah ay u isticmaalaan Saraakiisha iyo ciidamada dowladda iyo kuwa maamul goboleedyada Shisheeyaha hoos yimaada.
About The Author
