Jabhadda TPLF ayaa shaacisay in ay muhiim tahay in ay isbahaysi la sameysato dhammaan xoogagga ka soo horjeeda dowladda RW Abiy Axmed, iyadoo ku tilmaantay arrintaas mid lagama maarmaan u ah la dagaallanka waxa ay ugu yeertay halis wadajir ah.
Warsaxaafadeed kooxdu ay soo saartay talaadadii shalay ayay ku sheegtay in kulamo wada-tashi ah oo ay la yeesheen guud ahaan dadweynaha gobolka Tigray, la isla qaatay in lala midoobo kooxaha kale ee mucaaradka ku ah maamulka Addis Ababa.
“Shacabkeennu waxay si buuxda u taageerayaan halganka lagu dhisayo isbahaysiyo lala yeesho xoogagga kale ee iyaguna khatarta kala kulmaya nidaamkan xasuuqa ku dhisan, kaas oo doonaya inuu dhammaan khilaafaadka ku xalliyo awood ciidan,” ayaa lagu yiri bayaanka.
TPLF waxay sheegtay in amniga Tigray lagu sugi karo oo keliya iyadoo la xoojinayo awoodda ciidan, la kordhinayo askarta iyo taageerada saadka, isla markaana la adkeynayo midnimada shacabka iyo ciidamada gobolka.
Hoggaamiyaha TPLF, ee haatan fadhiya madaxtooyada Maqalla, Debretsion Gebremichael, ayaa hore u sheegay in jabhaddu ay doonayso inay iskaashi la yeelato ururrada siyaasadeed iyo kuwa hubeysan ee ka soo horjeeda dowladda.
Hadalkan ayaa yimid kadib markii xisbiga mucaaradka ah ee EPRP uu uga digay dowladda federaalka inay dalka dib ugu celinayso dagaal cusub oo ka qarxa gobolka Tigray, isagoo ku baaqay in si buuxda loo hirgeliyo heshiiskii nabadda ee Pretoria ee 2022.
Arrimahan ayaa imanaya iyadoo uu muran ka taagan yahay ereyga “Tsimdo”, oo lagu tilmaamo isbahaysi la sheegay inuu ka dhexeeyo Eritrea iyo garab ka tirsan TPLF, kaas oo Addis Ababa ay sheegtay in halis uu ku yahay amniga Itoobiya.
About The Author
