Jabhadda Xoreynta Dadka Tigrey-ga ee magacooda loosoo gaabiyo TPLF, ayaa ku eedaysay dowladda federaalka Itoobiya inay isu diyaarinayso, iska horimaad millitari oo mar kale ka dhaca gobolka Tigrey ee dhaca waqooyiga dalka Itoobiya.
TPLF waxay ku andacoonaysaa in masuuliyiinta Addis Ababa ay wadaan abaabul ciidan iyo duqeymo ka dhan ah gobolka Tigrey oo ay fuliyaan diyaaradaha aan duuliyaha lahayn ee Drones-ka, ayna sii xoojiyeen go’doominta ay ku hayaan gobolka.
Bayaan kasoo baxay TPLF, ayaa lagu sheegay in dowladda federaalka ee garwadeenka uu ka yahay Abiy Axmed ay mar kale garaacayso durbaannada dagaalka isla markaana isu diyaarinayso wareeg labaad oo colaad ah oo dhiig badan uu ku daadan doono.
Eedaymaha uu soo jeediyey TPLF, waxaa ka mda in duqeymo diyaarado aan duuliye lahayn laga fuliyay deggaanno kala duwan oo dhaca gobolka Tigrey, isla markaana ciidamada federaalka iyo maleeshiyaad xulafo la ah laga abaabulayo guud ahaan gobolka.
Waxa kale oo xukuumadda Abiy Axmed lagu eedeeyey inay soo rogtay go’doomin xaddiday helitaanka badeecadaha aasaasiga ah iyo dawooyinka, isla markaana ay ku guuldarraysatay inay fududeyso in barakacayaasha Tigrey ay dib ugu laabtaan deggaannadoodii ay ka qaxeen.
Bayaanka ayaa sidoo kale lagu sheegay in gargaarkii bani’aadantinimo ee la siin jiray dadka barakacay ee Tigrey uu hakad ku jiray saddexdii bilood ee la soo dhaafay, taas oo sii xumaysay ayaa la yiri, xaaladda dadka ay colaaddu saameeyeen.
Diyaar-garowga hawl-gallo millateri oo cusub oo dhawaan dowladda federaalku ku eedaysay TPLF, ayaa lagu soo hadal-qaaday bayaanka, waxaana lagu tilmaamay tallaabo lagu marin-habaabinayo xaaladda Tigrey oo ku wajahan shacabka gudaha iyo bulshada caalamka.
Warsaxaafadeedka kasoo baxay TPLF, ayaa sidoo kale lagu sheegay in bulshada gobolka Tigray ay xaq u leeyihiin inay is-difaacaan, iyadoo ugu baaqday inay taageeraan wax ay ugu yeertay xoogagga iska-caabbinta.
Bayaankan ayaa imanaya iyadoo ay dib u soo cusboonaadeen xiisadaha u dhexeeya dowladda federaalka iyo kooxda TPLF oo haatan gacanta ku haya maamulka Tigrey, iyadoo labada dhinac ay isweydaarsanayaan eedeymo ku saabsan xaaladda amniga ee gobolkaasi isla markaana ay ka digayaan suurtagalnimada in dib loogu laabto colaado hubaysan.
About The Author
