R/Wasaaraha Uganda haweenayda lagu magacaabo Robinah Nabbanja ayaa shaaca ka qaadday in muddo dheer aysan wax mushahar ah qaadan ciidamada Uganda ee duullaanka saliibiga ah ku jooga Soomaaliya, qaybtana ka ah hawl-galka isbahaysiga Afrikaanta.
Iyadoo ka jawaabaysa su’aalo ay weydiiyeen xildhibaannada baarlamaanka daaquudka Uganda, ayey sheegtay in xukuumadda Kampala ay ka hawl-gashay arrintan isla markaana ay dhawaan kala xaajootay golaha Midowga Afrika balse weli aan xal loo helin mushaar siinta ciidamada.
Gilbert Olanya oo ah xildhibaan ka tirsan baarlamaanka Uganda lagana soo doortay deggaanka Kilak South County, ayaa R/Wasaaraha hor-dhigay waydiin uu ku muujiyey walaaca xooggan ee ku dul-hoganaya ciidamadooda ku sugan Soomaaliya kuwaas oo muddo ka badan sanad aan wax mushahar ah iyo magdhow midna aan qaadan.
Olanya ayaa xusay in askar badan oo Yugaandheys ah oo muddo dheer ka dagaallamayey gudaha Soomaaliya ay dib ugu laabteen dalkooda iyagoo faramaran oo aan wax mushaar ah lasiinin halka askartii ku dhimatay dagaalladaas-na aan laga bixin wax magdhow ah.
“Askarta qaar waa la soo celiyay, nasiib darro, qaar kale waa la dilay. Waxaan jeclaan lahaa inaan ogaado qorshaha dowladda ee ku aaddan bixinta mushaharka iyo magdhow-ga kuwa aan weli la siin ee ka yimid Soomaaliya,” ayuu yiri Olanya.
“Bishii Febraayo ee sanadkan, madaxweynaha ayaa ii igmaday inaan tago Itoobiya oo aan la kulmo Midowga Afrika, sababtoo ah, sida aad la socotaan, muddo dheer ayay askarteennu ahaayeen kuwo aan mushaharkooda helin,” ayay tiri haweenayda R/wasaaraha ka ah Yugaandha
Waxa kale oo haweenaydan R/Wasaaraha ka ah Uganda ay ku tiraabtay erayo laga dheehan karo kaarto-bax iyo beerlaxawsi oo xubnaha baarlamaanka ay kaga codsatay in loo soo gudbiyo magacyada askarta Uganda ee ku geeriyootay dagaallada Soomaaliya.
Dowladda saliibiyadda Yugaandha waxaa soomaaliya uga sugan kumanaan kun oo askari kuwaas oo dalkan qaab calooshood ushaqeystanimo uga dagaallamayay ku dhowaad 20 sanadod xiriir ah.
Qaylo-dhaantan kasoo yeeraysa baarlamaanka Uganda ayaa imanaysa xilli ay sii laba laxaadsadeen caqabadaha amni iyo kuwa dhaqaale ee dul-hoganaya ciidamada Kufaarta Afrikaanta ah isla markaana Maraykanku uu dhawaan si cad u sheegay in gebi ahaanaba uu dhammaadka sannadkan jarayo taageeradii kala duwanayd ee uu siin jiray ciidamada Afrikaanta ee ku sugan Soomaaliya.
About The Author
