Degaanka Jaziira ee dhaca duleedka magaalada Muqdisho, waxaa si wayn looga hadal hayay dhacdo argagax leh oo lagu arkay xeebta deegaankaasi, kaddib markii baddu soo caarisay maydka nin aan la aqoonsan.
Dadka ku dhaqan deegaanka Jaziira waxay soo sheegeen inay arkeen maydka nin ay ka maqanyihiin qaar ka mid ah jirkiisa, waxayna sheegeen in ninkan oo ay ka maqanyihiin lug iyo gacan ay biyaha baddu kusoo caariyeen dibadda, waxayna u badan tahay bay dhaheen in bahal biyaha badda ku jira uu ka goostay lug iyo gacan.
Dadka deegaanka ayaa sheegay inay aqoonsan waayeen muuqaalka qofkan oo lagu sheegay in uu rag ahaa, balse ay qayb ka mid ah jirkiisa oo baddu soo caarisay ku aaseen bannaanka xeebta deegaanka Jaziira, waxayna dhacdadan argagaxa leh kusoo beegmaysaa xilli baddu kacsan tahay, badanaa xilliyadan oo kale waxaa dadka lagula taliyaa inay ka fogaadaan xeebaha maadaama ay suuragal tahay in debaylaha xoogga badan ee dhacaya ay sababaan inay baddu qaado kaddna ay halis gasho naftooda.
Dhowaan ayay ahayd markii xeebaha Jubbada hoose, gaar ahaan Kismaayo laga soo calaamadiyay in baddu qaadday dooni iyo dadkii la socday, waxayna qayb ka yihiin dad badan oo baddu la tagtay xilliyadan oo cimilladu is bedalaan.
About The Author
