Kooxda Shiicada ah ee Xuutiyiinta Yemen oo gacan-saar la leh dowladda Iiraan ayaa maanta oo Isniin ah ku dhawaaqday inay xayiraad kusoo rogtay isu-socodka maraakiibta Yahuudda ee Badda Cas.
Bayaan uu soo saaray afhayeenka Xuutiyiinta Yaxya Sariic ayaa lagu shaaciyey in kooxdu ay si buuxda oo dhamaystiran u mamnuucday maraakiibta Sahaayinada ee isaga gooshta biyaha Badda Cas.
Waxay kooxdu ka dhawaajisay in dhaqdhaqaaq kasta oo ay sameeyaan maraakiibta Yahuuddu uu noqon doono bartilmaameed millateri laga bilaabo waqtiga bayaankan la baahiyey.
Xuutiyiinta Yemen waxay sheegeen in go’aankan millateri ee ay soo saareen uu salka ku hayo dulmiga iyo weerarrada gardarrada ah ee Kiyaanka Sahyuunigu ka geysanayo Lubnaan, Qaza iyo Iiraan.
Falanqeeyayaasha ayaa walaac hor leh ka muujiyey arrintan, waxaanay tilmaameen in tallaabadani ay noqon doonto caqabad caalamiya oo la mid ah midda ka taagan marinka Hormuz.
Sidoo kale bayaankan ayay ku kooxdu ku qiratay fulinta weerarro gantaallo ah oo saacadihii lasoo dhaafay lagu garaacay gudaha deggaannada Yahuuddu ay xoogga ku haysato, sida maamulka Sahaayinada laftarkiisu uu xaqiijiyey.
Go’aanka Xuutiyiinta, ayaa imanaya iyadoo habeennimadii xalay Iraan ay weerarro gantaallo ah oo ay ugu aargudayso Lubnaan ku qaadday magaalooyinka waaweyn ee Yahuuddu ay xoogga ku deggen tahay.
Sahaayinada laftarkeeda ayaa iyaduna ka jawaabtay weerarradaasi waxaanay xalay iyo saakaba duqaymo culus ka geysteen magaalooyin dhowr ah oo ay ka mid tahay caasimadda Iran ee Tehran.
Weerarradani weli waa ay socdaan waxaanay xaaladda Bariga Dhexe u muuqataa mid faraha ka baxday, iyadoo moojado gantaallo aan kala joogsi lahayn laga soo sheegayo inay ku hoobanayaan magaalooyin badan oo Yahuuddu ay haysato.
About The Author
