Ugu yaraan 49 qof ayaa lagu dilay, 33 kalena waa lagu dhaawacay Koonfurta Suudaan, kaddib markii kooxo hubaysan ay weerareen bulsho xoolo-dhaqato ah oo ku nool gobola dhaca waqooyiga dalkaasi, sida ay warbaahinta u xaqiijiyeen saraakiisha dowladdu.
Weerarkan ayaa dhacay waaberigii hore ee khamiistii lasoo dhaafay, waxaana sida ay xoguhu tibaaxayaan fuliyey kooxo hubaysan oo ku caan-baxay dhaca lo’da, kana soo jeeda gobol ka mid ah gobollada ku yaal waqooyiga dalkaasi.
Sidoo kale rabshadaha u dhexeeya qabaa’ilka iyo bulshooyinka kala duwan ayaa aad ugu badan Koonfurta Suudaan, halkaas oo xoolo-dhaqatadu ay ku xifaaltamaan dhul-daaqsimeedka iyo biyaha loo waraab-geeyo xoolaha ay dhaqdaan.
Afhayeen u hadlay gobolka Unity oo ah halka ay kooxahani hubaysani kasoo duullaan-tageen, ayaa xaqiijiyey in qaybo ka mid ah burcaddan dadka laysay ay ka yimaaddeen gobolka Unity, isla markaana ay weerareen xoolo-dhaqato ku nool gobolka la deriska ah ee Warrap.
Maalmo ka hor ayay ahayd, markii dhegta dhiigga loo daray laba askari oo Itoobiyaan ah oo ka tirsanaa ciidamada urur-gaalleedka Qaramada Midoobey, isla markaana toddobo qof oo kalena lagu dhaawacay weerar gaadmo ah oo ka dhacay Koonfurta Suudaan.
About The Author
