Wararka ka imaanaya duleedka degmada Jigjiga ee xarunta dhulka Soomaali galbeed ayaa sheegaya in halkaasi uu ka dhacay shil aad u xooggan oo gaystay khasaare nafeed iyo mid hantiyeed oo baaxad leh.
Ilo dhanka deegaanka ah ayaa warbaahinta u xaqiijiyay in shilka uu si gaar ah kaga dhacay meel u dhow Shabeelley oo ah degmo dhacda duleedka magaalada Jigjiga ee xarunta Soomaali galbeed, waxaana inta la xaqiijiyay halkaas ku dhintay 11 xubnood, halka ay ku dhaawacmeen 12 kale, waxaana goor dambe la xaqiijiyay in mid ka mid ah dadkii bukaannada ahaa uu cisbitaalka ku dhintay, taas oo tirada guud ee dhimashada ka dhigaysa 12 xubnood.
Dadka dhaawacyada qaba waxay goobjoogeyaal soo wariyeen in xaaladdoodu tahay mid halis ah, waxaana xarumaha caafimaad ee bukaannada la dhigay buux dhaafiyay dad badan, kuwaas oo halkaasi ka baadi-goobaya inay ku jiraan ehelladooda.
Shilka baabuur oo ahaa mid argagax leh ayaa lasoo wariyay in uu yimid, kaddib markii ay isku dhaceen gaari Rakaab ah iyo nooca iska rogaha loo yaqaan ee ciidda iyo dhagxaanta daabula, sawirro la baahiyay ayaana muujinayay bruburka gaadiidka isku dhacay.
About The Author
