Ehellada wiil dhalinyaro ah oo lagu magacaabo Isxaaq Ibrahim, ayaa sheegay in aysan raq iyo ruux midna ku haynin wiilkooda oo maqan mudo 2 toddobad ah, kaas oo ciidamo ka tirsan dowlada Kenya ay ka afduubteen qaybo ka mid ah gobolka Mandheera.
1-dii Bishan May, ciidamo hubeysan oo xiran dareeska booliska dowladda Kenya ayaa weeraray guriga Isxaaq Ibraahim, oo ay yaaleen saddex baabuur oo landcruiser ah, maadaama uu Isaaq ka mid ahaa dareewaladda gaadiidka ee ka shaqaysta gobolka Mandheera.
Gurigiisa oo kuyaal xaafadda Buula-Afya ee degmada Ceel-qaalow ee gobolka Mandheera ayay ka qaateen ciidanka ammaanka ee Kenya, waxayna ehelladu sheegeen in si xoog ay uga saareen guriga, isagoo dhaawacyo qabana ay sii jiiteen.
Isxaaq Ibraahin ayaanan tan iyo 1-dii may warkiisa la maqal, qoyskiisuna waxay sheegeen inaysan raq iyo ruux toona ku haynin, balse loogu sheegay in loo qaaday dhanka Nairobi.
“Waxaan rumeysannahay in dadka afduubtay ay yihiin isla kuwa ammaanka dowladda ka tirsan, falka lagula kacay wuxuu ahaa mid aad u xanuun badan, waayo waxaa lagala baxay daaqadda gurigiisa,” ayuu yiri Xuseen oo ah walaalka ninka la afduubtay, isaga oo warbaahinta kula hadlay Nairobi.
Qoyska waxay sheegeen inay maxkamadda sare ee Nairobi ka codsadeen in ay baaraan dhacdadan, Isxaaq Ibraahim na la horkeeno maxkamadda, waa haddii aysan ciidanku dilin.
“Walaalkey Isaaq Ibrahim meel uu ku dambeeyey lama garanayo oo warkiisa dib looma maqal, waxaana jirta cabsi macquul ah, taasoo ah inay afduubteen saraakiil ciidan, kuwaasi oo qoyskiisa u diiday in ay kusoo booqdaan xabsiga sidoo kalena u diiday in la horgeeyo maxkamadda.” Ayuu yiri Xuseen.
Kenya, waxay muddooyinkan dambe kordhisay xarigga sharci darrada ah ee ay ka wado xuduud beenaadyada, si gaar ah gobollada Gaarissa, Mandheera iyo Wajeer oo ah dhul ay leeyihiin dadka Soomaaliyeed.
About The Author
