Dagaalka culus ee u dhaxeeya maleeshiyaadka Axmaarada iyo kuwa Tigreega ee ka socda maniqadda lagu muransan yahay ee Raya ayaa dhaliyay xaalad adag oo dhanka nolasha ah, waxaa magaalooyin ka tirsan mandiqaddaasi laga soo sheegayaa xaalado dhmasho iyo kuwa bani’aadanimo.
Warbaahinta maxalliga ayaa maamulka gobolka kasoo xigtay in dagaallada u dhaxeeya labadaani maleeshiyo ay hakad geliyeen adeegyada aasaasiga u ah nolasha dadka, tan iyo bishii lasoo dhaafay, si gaar ahna waxay xaaladdan u saameysay dadka ku dhaqan magaalada Alamata iyo deegaanada ku xeeran.
Isku dhacyadu, waxay sidoo kale keeneen inay kasii darto xaaladda bini’aadanimo, waxaana dadka deegaannadaas soo food saartay xaalado ay ka mid yihiin waxbarasho la’aan iyo inuu gabaabsi noqdo daryeelka caafimaadka.
Hailu Abera waa madaxa maamulka ee magaalada Alamata wareysi uu siiyay idaacadda codka Mareykanka, ayuu ku sheegay in 11 xubnood ay u dhinteen daryeel xumo caafimaad oo aaggan dagaal ka jirta, Cisbitaalka kaliya ee kuyaal deegaankaas ayaa la sheegay in muddo ku dhow bil uu howlgab yahay.
Dhanka waxbarashada ayuu sidoo kale si wayn u saameeyay dagaalka TPLF iyo Axmaarada u dhaxeeya, Hailu oo sii hadlayay waxa uu sheegay in in ka badan 42,000 oo arday oo wax ka dhigta 123 Iskuul oo ku kala yaal Alamata, Raya Bala, iyo magaalada Korem ay dagalladu ku qasbeen in ay ka tagaan waxbarashadooda.
Colaadda u dhaxaysa Axmaarada iyo Tigreega ee ka taagan mandiqadda lagu muransan yahay ee Raya ayaa soo bilowday bartamaha bishii ina dhaaftay ee Aprill, waxayna xaaladdu kasii dartay markii maalmihii lasoo dhaafay ay iska hor’imaadyo rabshado wata labada dhinac ku dhexmareen degmada Alamata, oo dhacda Koonfurta Gobolka Tigray.
Isku dhacyadan hubeysan ayaa keenay barakaca dad aad u badan oo ka mid ah labada qowmiyadood, kuwaasoo lagu sheegay inka badan 50,000 oo rayid ah iyo mas’uuliyiin maamul, waxayna masuuliyiinta Axmaarada magangalyo u tageen magaalada deriska la ah Amata ee Kobo, oo kutaal gobolka Amhara.
About The Author
