Shil xooggan oo khasaare kala duwan gaystay ayaa maanta ka dhacay meel u dhow magaalada Carta ee waddanka Jabuuti.
Ilo wareedyo dhanka deegaanka ah ayaa soo wariyay in shilkan gaari uu ka dhacay waddada isku xirta magaalooyinka Carta iyo caasimadda, gaar ahaan halka lagu magacaabo PK30 ee ku dhow Carta.
Shilka ayaa yimid kaddib markii ay isku dhaceen gaari nooca xamuulka qaada iyo baabuur nooca Baska dadweynaha, waxaana goobtaasi laga diiwaan geliyay khasaare kala duwan oo dhaawacyo u badan.
Gaadiid ka baxay dhanka Carta ayaa lasoo sheegay inay daabuleen ilaa 20 qof oo dhaawacyo kala duwan qaba, waxaana lasoo wariyay inay xaaladdiisu daran tahay darawalkii waday mid ka mid ah gaadiidka isku dhacay.
Sawirro lagu faafiyay baraha bulshada ayaa muujinayay burburka gaaray gaadiidka isku dhacay iyo gaadiid kale oo ku xayiran goobta ay dhacdadu ka dhacday, waddada uu shilku ka dhacay ayaana ahayd mid ciriiri ah.
Dhaawacyada labaatanka qof ayay wararku sheegayaan in la kala geeyay cisbitaallada kala duwan ee kuyaal magaalada jabuuti ee caasimadda u ah waddankaasi, waxaana xusid mudan in shilalka gaadiidka ay ku soo bateen waddada isku xirta magaalooyinka Carta iyo tan caasimadda ah, taasi oo ay sabab u tahay xawliga iyo darawalada oo si taxadar la’aan ah u kaxeeya gaadiidka, sidoo kale waxaa loo aaneeyaa shilalkaasi in uu jiro ciriiri badan oo ka dhasha gaadiidka waaweyn ee xamuulka qaada.
About The Author
