Mandiqadda lagu magacaabo Goojam ee ka tirsan ismaamulka Amhara ee dalka Itoobiya, waxaa ka soconaya dagaallo culus oo u dhaxeeya ciidamada millatariga iyo kuwa Fano ee kasoo horjeeda nidaamka Abiy Axmed, halkaas oo maalmihii u dambeeyay laga soo sheegayay xasuuqyo ka dhan ah dadka aan hubeynayn.
Ciidamada nidaamiga ah ee dowladda saliibiyadda xabashida, ayaa guulo ka sheegtay dagaalka ay kula jiraan maleeshiyada jabhadda mucaaradka ah ee lagu magacaabo Fano, waxayna sheegeen inay dileen boqollaal askari oo ka tirsanaa maleeshiyada kooxdaasi.
Bayaan kasoo baxay ciidamada millatariga Abiy Axmed ayaa lagu sheegay in weerar ka dhacay gudaha Goojam ay ku dileen inka badan 300 oo askari oo ka tirsanaa maleeshiyada jabhadda mucaaradka ah ee Fano.
Warka kasoo baxay ciidanka millatariga ayaa sidoo kale lagu sheegay in weerar ciidamadoodu ka fuliyeen waqooyiga mandiqadda Shewa ay ku toogteen ilaa afar sarkaal oo ka tirsanaa Fano iyo 50 dagaalyahan oo hubeysan, waxay sidoo kale ciidanka Itoobiya shaaciyeen inay gacanta ku dhigeen 30 xubnood oo dhaawacyo ah, hub iyo agabyo kala duwan oo kuwa ciidanka ah.
Khasaaraha uu taliska ciidanka millatariga xabashida Itoobiya shaaciyay inay u gaysteen maleeshiyaadka jabhada xoraynta dadka Axmaarada ayaa yimid, xilli maalmihii lasoo dhaafay duqaymo culus laga soo sheegayay deegaanno dhaca bariga Gojjam, halkaas oo lagu laayay inka badan 120 qof oo rayid ah.
Duqaymaha oo lagu dilay inka badan 120 qof oo Axmaaro ah ayay ciidamada Itoobiya si gaar ah uga fuliyeen deegaanka Gedebe ee ka tirsan degmo Enarj Enawga ee bariga mandiqadda Gojjam.
Dhanka kale, warar lagu faafiyay baraha bulshada ayaa muujinayay saraakiil sar sare ah oo laga qabtay ciidamada millatariga Itoobiya ee duullaanka kaga jira ismaamulka Axmaarada.
Baraha taabacsan mucaaradka ayaa lagu faafiyay xogta in la qabtay sarkaal sare oo ka tirsanaa ciidamada millatariga Abiy Axmed, sarkaalka ciidan ee ay qabteen maleeshiyaadka Faano ayaa magaciisa lagu sheegay Chanie Legesse Cali.
Sarkaalkan ayay wararku sheegayaan in maleeshiyada kacdoonka kula jira millatariga Itoobiya ay 21-kii bishan Abriil ku qabteen magaalada Keyit ee ku taalla waqooyiga mandiqadda Shewa ee ismaamulka Amhara.
Sawirro lagu faafiyay barta lagu magacaabo X ee horay loo oran jiray Twitter ayaa muujinayay maleeshiyaad ka tirsan fallaagada Fano oo gacanta ku haya sarkaalkan sare ee ka tirsan millatariga xabashida, waxay sidoo kale ilahan taabacsan mucaaradka sheegeen in sidoo kale Fano ay gacanta ku hayso kornayllo ka tirsan millatariga.
Tan iyo markii dowladda Itoobiya ku dhawaaqday burburinta maleshiyaadka Liyuu booliska ee ismaamullada dalkaasi, waxay mucaaradka hubeysan ee Axmaarada kordhiyeen weerarada ka dhanka ah dowladda, maamulka Abiy Axmed ayaa ciidamo fara badan ku daabulay ismaamulkaas si uu usoo afjaro Fano, balse maleeshiyadan oo taageero ka helayay dadka deegaanka ayaa dagaal adag la galay ciidanka millatariga, kaasi oo ilaa hadda ka soconaya deegaanno badan oo ismaamulkaasi ka tirsan.
About The Author
