Iska hor’imaad culus oo u dhaxeeyay ciidamada dowladaha Yugaandha iyo South Sudan ayaa ka dhacay xuduudda ay wadaagaan labadaasi dal, halkaas oo ay askar isaga dileen labadan ciidan ee xuduudda ku dagaallamay.
Wakaaladda wararka ee Reuters ayaa sheegtay in iska hor’imaadkaasi ay ku dhinteen ugu yaraan lix askari oo labada dhinac ka kala tirsan, waxayna ciidanku isku qabteen meel u dhow xuduudka ay wadaagaan, ahna goob ay ku muransanyihiin labada dhinac.
Wakaaladda oo soo xiganayso saraakiil ka tirsan dowladda Suudaanta Koonfureed ayaa sheegtay in cutubyo ka tirsan labada ciidan ay is-rassaasayn ku dhex martay deegaan lagu magacaabo Kajo Keji oo dhaca Suudaanta Koonfureed, isku dhacaasi ciidan ayaa sababay dhimashada 5 askari oo ka tirsanaa ciidanka South Sudan ee magacooda loo soo gaabiyo (SSPDF).
Dhankiisa, afhayeenka ciidanka dowladda Yugaandha Felix Kulayigye, ayaa sheegay in ciidanka SSPDF ee Suudaanta Koonfureed ay soo galeen gobolka West Nile ee dalkiisa Yugaandha, ayna diideen inay ka baxaan aaggaasi, taa waxay keentay buu yiri inay rasaas dhacdo, goobtana uu kaga dhintau hal askari oo Yugaandhees ah.
Ismaamulka Kajo-Keji ayaa qoraal uu soo saaray ku sheegay in shan askari oo ka tirsanaa ciidanka SSPDF lagu dilay weerar kedis ah oo ay soo qaadeen ciidanka Uganda, isla markaana ay wehlinayeen taangiyo iyo madaafiicda goobta, ciidanka Suudaanta koonfureed dhankiisa wuxuu xaqiijiyay isku dhaca ciidan, balse masoo hadal qaadin askarta 5-ta ah ee goobta dagaalka looga dilay.
Iska hor’imaadkan ayaa qayb ka ah isku dhacyo dhowr jeer oo hore xuduudda ku dhexmaray ciidamada labada dal ee Uganda iyo Suudaanta koonfureed, isku dhacyadu waa kuwa yaryar oo marmar dhaca, waxaana labada dowladood ka dhex jira khilaaf iyo ismariwaa dhanka xuduudda ah.
Afhayeenka ciidanka SSPDF ninka lagu magacaabo Lul Ruai Koang ayaa war uu soo saaray ku sheegay in guddi ka kooban labada dhinac oo xuduudeed oo jira ay eegi doonaan sida lagu heli karo xal rasmi ah oo soo gabagabeyn kara khilaafaadka soo noqnoqda ee la xiriira soohdinta labada dowladood.
About The Author
