Weerarrada joogtada ah ee ka socda gudaha Itoobiya oo marba marka ka dambaysa sii laba-laxaadsanaya ayaa dagaallo hor leh oo khasaare badan geystay laga soo sheegayaa in ay si gaar ah uga socdaan guud ahaan gobolka Amxaarada, halkaas oo si weyn loogu wiiqay ciidanka Xabashida Itoobiya.
Maleeshiyaadka u dhaqdhaqaaqa Amxaarada ee loo yaqaan Fano ayaa lagu soo warramayaa in weerarro xooggan ay ka fuliyeen koonfurta gobolka Gonder, waxaana sida ay Jabhadda Fano sheegatay dagaalladaasi lagu dilay ugu yaraan 66 askari oo ka tirsanaa ciidanka dowladda saliibiyadda ah ee federaalka Itoobiya.
Sida laga soo xigtay warbaahitna Ethio Focus, dagaalkan ayaa ka dhacay dhowr deggaan oo dhaca koonfurta Gonder, waxaana lasoo werinayaa in ugu yaraan 4 askari oo mid ka mid ah uu taliye ahaa laga dilay dhinaca maleeshiyaadka Fano, inkastoo maamulka Addis Ababa aanu ka hadal dagaalkan.
Sidoo kale deggaanno ka tirsan Waqooyiga Shewa waxaa lagu soo warramayaa in sabtidii lasoo dhaafay ay ka dhaceen dagaallo culus oo maryo dhiigle lagu kala furtay, gaar ahaan labo aag oo ku dhow magaalada Ataaye. Balse ilaa hadda lama shaacin khasaaraha dhabta ah ee kala gaaray labada dhinac.
Xogtu waxay tibaaxaysa in ciidamada dowladda ee deggaannadaasi la geeyey ay u badan yihiin kuwa komaandooska. Iyadoo 4 askari lagu soo warramayo inay ka goosteen ciidankaasi, iskuna dhiibeen maleeshiyaadka Fano.
Weerarro dhabbo-gal ay ayay wararka qaar sheegayaan in deggaannada qaar loogu dhigay kolonyo gaadiid dagaal ah oo ciidanka dowladdu ay wateen. Iyadoo dhinaca deggaanka Bahar Dar-na laga soo sheegayo dagaallo culus oo saacado badan qaatay subaxnimada sabtidii lasoo dhaafay ka bilowday agaggaasi.
Sidoo kale deegaanka Raya-Kobo ee Waqooyiga Wollo waxaa ka dhacay dagaallo xooggan, kadib markii ay is fara saareen ciidanka dowladda iyo maleeshiyaadka Fano, waxaana lagu soo warramayaa in maleeshiyaadku ay la wareegeen gacan-ku-heynta magaalo lagu magacaabo Robit.
Jabhadda Fano ayaa shaacisay in qoriga loo yaqaan ZU-23 iyo labo hoobiye ay kusoo furteen dagaalladaasi, iyadoo maamulka Abiy Axmed uu eedayn kasoo saaray hawl-galladan oo uu ku sifeeyey mid ay wada-jir u fuliyeen maleeshiyaad ka kala tirsan Jabhadaha Fano iyo TPLF.
Hawl-galladan oo si weyn ay u tebinayaan warbaahinta maxalliga ah iyo ilo-wareedyo dhinaca baraha bulshada ah ayaa muujinaya in Jabhadda Fano ay hawlgallo xooggan ka waddo deegaanno badan oo ka tirsan gobolka Amxaarada, oo ay ku jiraan beegsiga xeryaha militariga dawladda ee deegaannada qaar.
About The Author
