War-saxaafadeed ay soo saartay Jabhadda Fano ayay ku sheegtay in guullo waaweyn ay ka gaartay dagaallo culus oo saacadihii lasoo dhaafay ka dhacay deggaanka Mersa ee ka tirsan degmada Habru ee waqooyiga Wollo ee gobolka Amxaarada.Taliska guud ee maleeshiyaadka Fano ee bariga Axmaarada, ayaa shaaca ka qaaday in dhegta dhiigga ay u dareen ku dhawaad 20 askari oo ka tirsan ciidamada dowladda, kadib dagaal culus oo labada dhinac ay foodda isku dareen oo ka dhacay meel u dhow magaalada Mersa.
Cutubka bari ee maleeshiyaadka Fano ee taliska Minilik Eez, ayaa sheegay in guul ay ka gaareen dagaal ka socday deggaankaasi muddo saddex maalmood oo xiriir ah, isagoo intaas ku daray in guushani ay ku timid kadib markii ay qaadeen hawlgal ciidan oo qorshaysan oo ka dhan ah ciidanka dowladda.
Bayaanka ayaa lagu sheegay in tiro badan oo ka tirsan ciidanka federaalka Itoobiya ay ku dhaawacmeen dagaalkaasi, kuwaas oo sida la xaqiijiyey la arkay askar badan oo tirakoobkooda aan la sheegin oo lagu daaweynayo cisbitaalka Mersa.
Sidoo kale maalmo ka hor ayaa la sheegay in askar badan oo ka tirsan ciidanka dawladdu ay dhimasho iyo dhaawac ku noqdeen weerar ka dhacay deggaanka Tedot Michael oo ku dhow isla magaalada Mersa, iyadoo aaggaasi lagu xasuusto weerarro khasaare badan loogu geystay isla ciidamadaasi.
Maalinnimadii shalay waxaa sidoo kale uu dagaal culus ka dhacay deggaanka Tekleshe oo ka tirsan degmada Kobo ee isla deegaanka Raya. Waxaanay Fano sheegtay in guullo ay ka gaareen dagaalkaasi, kadib markii maleeshiyaadka Fano ay si lama filaan ah u weerareen xeradii difaaca.
Dhimasho iyo dhaawac badan oo soo gaaray ciidamada Itoobiya ayaa lasoo weeriyey, iyadoo sida uu Wargeyska Borkena sheegay dagaalkaasi ay maleeshiyaadka Fano kusoo qabteen maxaabiis fara badan oo ka tirsan ciidanka dawladda.
Geesta waxaa soo baxaya warar sheegaya dagaal culus oo maleeshiyaadka Fano iyo ciidanka dawladda u dhaxeeya oo ka socda deggaano kala duwan oo ka tirsan Koonfurta Wollo. Waxaanay wararka laga helayo goobtu ay sheegayaan in dagaalkaasi uu sii xoogaystay.
About The Author
