Wararka ka imanaya gudaha Itoobiya ayaa sheegaya dagaal culus oo mar kale ka dhex-qarxay ciidanka Xabashida Itoobiya iyo maleeshiyaadka jabhadda xoreynta Tigrey-ga ee TPLF.
Dagaalkan ayaa talaadadii lasoo dhaafay ka bilowday galbeedka gobolka Tigrey, kadib markii maleeshiyaadka TPLF ay weerar ku qaadeen magaalada Tselemti (Salemti) oo fariisin u ahayd ciidanka millateriga federaalka Itoobiya.
Sida ay xogtu tibaaxayso, jabhadda TPLF ayaa la sheegay in ay cagta mariyeen ciidanka Itoobiya isla markaana ay si buuxda ula wareegeen gacan-ku-haynta magaalada Tselemti iyo deggaannada ku dhow oo dhan.
Ilo-wareedyo maxalli ah ayaa sheegaya in maalinnimadii shalay diyaaradaha dagaalka ee maamulka Abiy Axmed ay duqeeyeen xaafado ka tirsan magaalada Tselemti oo jabhadda TPLF ay xoog kula wareegtay.
Xogo dheeraad ah oo soo baxaya ayaa sheegaya in maleeshiyaadka Tigrey-gu ay sidoo kale shalay weerarro ku qaadeen ugu yaraan saddex deggaan oo ku dhow magaalada Tselemti oo dhacda galbeedka gobolka Tigrey.
Maleeshiyaadka TPLF ayaa la xaqiijiyey in saacadihii lasoo dhaafay ay sidoo kale gudaha u galeen magaalada Walkait (Walkayt) oo muddo afar sannadood ah gacantooda ka maqnayd.
La wareegista deggaannadan ayaa la sheegay in maleeshiyaadka Tigrey ay u saamaxday kadib markii ay ka gudbeen webiga Tekeze, oo millateri ahaan muhiim u ah deggaannadan.
TPLF ayaa la sheegay in maleeshiyaad fara badan ay ka gudbisay webiga kuna daabushay deggaannadan ay gacanta ku dhigeen ee Tselemti iyo Walkait oo sida la sheegay weli xaalkoodu aanu deggenayn, duqayn xoogganna ay ku socoto.
Labada dhinac midkoodna ma uusan sheegin khasaaraha dhimasho iyo dhaawac ee ka dhashan dagaalladan, iyadoo dagaalladii 2020-kii dhex-maray ciidamada Itoobiya iyo maleeshiyaadka TPLF ay ku dhinteen dad lagu qiyaasay 600,000 (Lix boqol oo Kun) oo qof.
Dagaalkan hadda dib u qarxay oo in badan laga digayay ayaa kusoo aaday xilli aad looga dayrinayo xaaladda amni ee Itoobiya, isla markaana maamulka Abiy Axmed-na ay furimo xooggan oo aad loogu wiiqay ciidankiisa kaga furan yihiin gobollada Amxaarada iyo Oromada.
About The Author
