Taliyaha Ciidamada Uganda, Jeneraal Muhoozi Kainerugaba, ayaa taageero kal iyo laab ah u muujiyey Yahuudda, xilli uu socdo dagaalka Iiraan, sida lagu sheegay warbixin uu daabacay wargeyska The Jerusalem Post oo ka mida warbaahinta ugu afka dheer Sahaayinada.
Qoraallo taxane ah oo maalmahan u dambeeyey uu ku baahiyey bartiisa xiriirka bulshadda ee X/Twitter, ayuu Gen. Kainerugaba ku caddeeyey in Uganda ay dagaalka geli doonto isla markaana ay weerari doonto Iiraan haddii la jebiyo Yahuudda.
“Waxaan rabnaa in dagaalka Bariga Dhexe uu hadda dhammaado. Dunidu way ku daashay,” ayuu qoray, isagoo intaas ku daray in hadal kasta oo ku saabsan burburinta ama jabinta Israel ay Uganda ku khasbanaan doonto in dagaalka ay gasho.
Qoraal kale oo wargeysku sheegay in markii dambe la tirtiray, ayuu Janaraal Kainerugaba ku sheegay in Ciidamada Uganda, ay bilaabi doonaan sidii ay uga qayb-qaadan lahaayeen dagaalka iyagoo barbar istaagaya Israel haddii uusan si dhakhso ah u dhammaan.
“Israel waxay xaq u leedahay inay jirto, weerarrada ka dhanka ahna waa in la joojiyaa,” ayuu yiri, Jeneraal Muhoozi Kainerugaba, sida lagu sheegay warbixintan oo maanta oo Khamiis ah lagu soo daabacay baalasha hore ee wargeyska The Jerusalem Post.
Sidoo kalen Gen. Muhoozi Kainerugaba wuxuu sheegay in Uganda ay diyaar u tahay inay taageerto Yahuudda, isagoo dhanka kalena caawimo millateri oo ka dhan ah Iiraan u bandhigay isbahaysiga Maraykanka iyo Sahaayinada.
“Waxaan qabsan kari lahayn Tehran 72 saacadood gudahood annagoo aan wax duqeyn ah samayn,” ayuu ku dooday, “laakiin dabcan marnaba ma dhegaystaan nin madow…” ayuu yiri taliyaha ciidamada Uganda, Gen. Kainerugaba.
Wargeysku waxa kale oo warbixintiisan uu ku sheegay in Gen. Kainerugaba uu bishii hore ku dhawaaqay in Uganda ay dhowaan garoonka diyaaradaha ee Entebbe International Airport ka dhisi doonto taallo lagu sharfayo askari Yahuudi ah oo lagu magacaabi jiray Yonatan Netanyahu.
Askarigan oo R/Wasaaraha hadda ee Yahuudda ay walaalo ahaayeen, ayaa ku dhintay hawl-gal uu hoggaaminayay oo 1976-kii ka dhacay gudaha Uganda, kaas oo lagu soo furanayay rakaab Yahuud ah oo lagu afduubtay diyaarad Faransiis ah, taas oo laga dejiyey magaalada Entebbe.
Wuxuu sheegay in taallada laga dhisi doono goobtii saxda ahayd ee Yonatan Netanyahu lagu dilay isagoo doonayay inuu soo furto ku dhowaad 100 qof oo Yahuud ah oo la afduubtay. Isagoo intaa raaciyey in astaantani ay muujinayso xiriirka qotoda dheer ee Talaabiib iyo Kampala.
About The Author
