Dowladaha Masar iyo Eretriya ayaa kala saxiixday heshiisyo xoojinaya iskaashigooda Badda Cas, gaar ahaan dhinacyada dekedaha, gaadiidka iyo amniga, xilli Itoobiya ay xusul-duub ugu jirto damaceeda bad-raadiska ah.
Heshiisyada labada dal ay qalinka ku duugeen waxaa ka mida isku-xirka dekedaha ay gacanta ku hayaan iyo maraakiibta isaga kala gooshta Badda Cas.
Waxa kale oo ay isla meel-dhigeen in dowladda Masar ay Eritrea ka taageerto horumarinta dekedaha, gaadiidka iyo kaabeyaasha dhaqaalaha.
Waxay sidoo kale ka wada hadleen ammaanka Badda Cas, iyagoo sheegay in amniga badda ay mas’uul ka yihiin dalalka ku teedsan xeebaha, isla markaana aysan ogolaan faragelin shisheeye.
Wasiirka arrimaha dibadda Masar ayaa ku nuuxnuuxsaday in waddan kasta oo badda cas ku yaalla ay mas’uuliyad ka saaran tahay inuu xaqiijiyo ammaanka xeebihiisa.
Masar ayaa isku dayaysa inay Itoobiya cadaadis ku saarto dhinaca badda, maadaama uu weli cakiran yahay khilaaf xooggan oo ka dhashay biyaha webiga Niil oo u dhaxeeya labada dhinac.
Heshiiska Eretariya iyo Masar ayaa kusoo aadaya xilli Itoobiya ay sare u qaadday damaceeda gurracan ee bad-raadiska ah, kaas oo ay ka dhigtay ajande qaran oo lagama maarmaan ah.
About The Author
