Waaliga wilaayada islaamiga ah ee Shabeelaha Hoose, Sheekh Muxamad Abuu Usaama oo meel munaasabad ah ka khudbeenayay ayaa soo hadal qaaday tacaddiyo kala duwan oo uu Mareykanku ka wado gobolka Shabeelaha Hoose.
Ugu horreyn waxa uu u tacsiyeeyay nin ganacsade caan ahaa lagana yaqaanay inta badan Jubooyinka iyo Sh/hoose oo uu Mareykanku todobaadkii lasoo dhaafay ku dilay duqeyn diyaaradeed oo uu ugu geystay meel 18km u jirta degaanka Kuunyobarrow.
Taliska Mareykanka ee Africom ayaa sarkaal Al-Shabaab ah ku tilmaamay ganacsade Aboow Cali Waardiyoow oo uu degaankiisu ahaa Arabow oo hoos taga Bu’aale. Sheekh Abuu Usaama ayaa sheegay in dhaqanka Mareykanka uu noocaan yahay islamarkaana aaney jirin qolo gaar ah oo uu la dagaashan yahay balse uu cadaw u arko qof walba oo ashahaata.
Dadka degaanka Arabow iyo dhammaan tuulooyinkii uu ka shaqeysan jiray Aboow ayaa la yaabay warka Mareykanka oo ay ku tilmaameen mid jees-jees ah, waxaana ay sheegeen in tacaddigaasi uu yahay godob diiwaanka ugu jirta oo aaney hilmaami doonin.
Waaliga Sh/hoose ayaa murugada la qeybsaday ehellada ninkaasi, beeraleyda, xoolaleyda iyo gaadiidleyda ahaa kaasoo dilkiisa ay ku agoontoobeen 13 caruur ah oo 2 kamid ah caloosha lagu wado.
Mareykanka ayaa dadkii uu hadda ka hor Bariire ku laayay ku tilmaamay iney ahaayeen Shabaab kuwaasoo meydadkooda la geeyay CID- saxaafadduna ay indhaheeda ku aragtay iney xataa caruur kamid ahaayeen.
Sheekh Abuu Usaama ayaa dhanka kale ka hadlay hawl gallo ay si wada jir ah u sameeyaan Mareykanka iyo ciidamada uu ku ugaarto ee Bankarafta la yiraahdo, hawlgalladaas oo lagu soo af duubto beeraleyda iyo xoolaleyda.
Ujeedada hawl galladan ayuu Sheekhu sheegay iney yihiin kuwa uu Mareykanku ku doonayo inuu si qasab ah jawaasiis ugu qorto, waayo dadka ay qafaashaan ayuu tilmaamay iney sii deyntooda shuruud uga dhigaan iney jawaasiis u noqonayaan, “waana aragnay” buu yiri’ dad ay sidaas ula soo dhaqmeen.
Ugu dambeyn wuxuu bulshada uga digay dhagarahaas oo uu ku tilmaamay iney yihiin kuwa ay il gaar ah ku hayaan.
Halkan Ka Degso Kalimadda Waaliga
About The Author
