Ugu yaraan Lix askari oo ka tirsan ciidamada urur-gaaleedka Qaramada Midoobay ayaa lagu diley weerar loo adeegsadey diyaarado drone ah, oo lagu beegsadey xero ay kaga sugnaayeen magaalada Kadugli ee gobolka Kordufan ee dalka Suudaan.
Sidoo kale, weerarkan waxaa lagu dhaawacay 8 kale, oo 4 ka mid ah xaaladdooda caafimaad ay aad u liidato, waxaana askarta la beegsadey ay kasoo jeedaan waddanka Bangladesh.
Weerarkan waxaa lagu eedeeyay ciidamada RSF ee daacadda u ah dowlada Riddada Imaaraatka Carabta, hase yeeshe war ay maleeshiyaadku ku daabaceen baraha bulshada ayay kaga soo horjeesteen eedeymaha loo soo jeediyay, oo ay ku tilmaameen kuwa aan sal iyo raad toona lahayn.
Ra’iisul wazaaraha Bangaladesh, Maxamuud Yuunis iyo xoghayaha guud ee ururka Qaramada Midoobay Antonio Guterres, ayaa walaac xooggan ka muujiyay weerarkan diyaaradda loo adeegsadey ee ka dhacay dalka Suudaan, waxaaney sheegeen in ay si aad ah u cambaareenayaan, islamarkaana uu ku beerey murug iyo werwer.
Tan iyo markii maleeshiyaadka RSF ay bishii lasoo dhaafey la wareegeen magaalada Al-Faashir, waxay inta badan howlgalladooda u wareejiyeen gobolka Kordufan, waxaana macluul daran laga soo sheegayaa deegaananda gobolkan, maadaama uu go’doon ugu jiro maleeshiyaadka.
Wararkii ugu danbeeyay ayaa sheegaya in duqeyn cusub oo ay maleeshiyaadku maalinimadii shalay ee Axadda, ay ka geyteen magaalada Dalinj ee dhacda koonfurta gobolka Kordufan ay ku dhinteen 7 qof oo rayid, halka ay ku dhaawacmeen 12 kale.
About The Author
