Sida ay wararku tibaaxayaan, madaxa maamulka ashshaado-la-dirirka Somaliland, murtad C/Raxmaan Maxamed Cabdillaahi (Cirro) ayaa shalay si rasmi ah xarigga uga jaray safaarad-ku-sheeg uu ka furay magaalada ay Yahuuddu haysato ee Qudus.
Wasiirka Arrimaha Dibadda Sahaayinada, Jidcoon Sa’ar, oo munaasibadda xarig-ka-jarka goob-joog ka ahaa ayaa sheegay in murtad Cirro uu iskiis u go’aansaday in safaaradda uu ka furo Qudus, taas oo Somaliland ka dhigaysa ayuu yiri dalkii 8-aad ee safaarad ka furta magaaladan.
R/Wasaaraha Yahuudda Binjamin Netanyahu oo isna shalay la kulmay weftiga Somaliland, ayaa shaaciyey in madaxweyne Cirro iyo xukuumaddiisu ay iyagu go’aansadeen in safaarad ay ka furtaan Qudus, tallaabadaas oo uu tilmaamay inuu aad ugu farxay isla markaana uu ka mahad-celiyey.
Waxa kale oo Netanyahu uu sheegay in sida ay Somaliland u quuda-raynayso inay dalal kale ka hesho aqoonsi, uu maamulka Yahuudduna sidoo kale isna uu rajaynayo inuu helo dalal kale oo Qudus u aqoonsada caasimadda maamulka Sahaayinada.
Intii uu kulanka iyo wada-hadalladu socdeen waxa uu Netanyahu la-yaab muujiyey sida murtad Cirro iyo kooxdiisu ay isla markiiba Qudus ugu aqoonsadeen inay tahay caasimadda maamulka Yahuudda ee xoogga ku haysta dhulka muslimiinta ee reer Falastiin.
“Dalal badan aqoonsigoodu wuu daahay, balse idinku si deg-deg ah ayaad u aqoonsateen in Qudus ay tahay caasimadda Israa’iil, taas-na aad ayaan u soo dhawaynaynaa.” Ayuu yiri R/Wasaaraha Yahuudda, ninka lagu magacaabo Binjamin Netanyahu.
Tallaabada uu qaaday murtad Cirro iyo kooxdiisa ee la xiriirta safaaradda ka furteen magaalada barakaysan ee Qudus, ayaa ka dhigan in qibladii koowaad ee Islaamka ay u aqoonsadeen caasimadda maamulka sahyuuniga ah ee Yahuudda.
About The Author
