Shil gaystay khasaare isugu jira dhimasho, dhaawac iyo burbur hantiyeed ayaa ka dhacay harada Victoria ee kutaal meel u dhow jasiiradda Remba ee deegaanka Suba ee ismaamulka Homa Bay ee dalka Kenya.
Shilka ayaa yimid markii ay isku dhaceen dooni kalluumeysi iyo markab sida ay soo werisay warbaahinta maxalliga ah ee Kenya, waxaana halkaas ku dhintay ugu yaraan saddex qof oo kalluumeysato ah.
Edward Oremo, guddoomiyaha laanta maareynta xeebta ee ismaamulka Homa Bay, ayaa ka hadlay dhacdadan, wuxuuna sheegay in doonida uu soo gaaray burbur xoog leh, ilaa saddex qaybna ay ukala jabtay.
Marka laga soo tago saddexda kalluumeysatada ah ee ku dhintay shilkan ka dhacay harada Victoria, waxaa dhanka kale uu dhaawac soo gaaray hal qof, kaasi oo dhaawaciisa la geeyay goob caafimaad, saraakiisha dowladda Kenya waxay sheegeen inay billaabeen baaritaanno ku saabsan shilka.
About The Author
