Dowladda Ingiriiska ayaa xoojisay digniinteeda ku safarka gudaha Itoobiya, iyadoo muwaadiniinteeda uga digtay inay gabi ahaanba u safraan gobollo iyo xuduudo badan sababo la xiriira amni darro. Digniintan ayaa ka timid Wasaaradda Arrimaha Dibadda Ingiriiska.
Xukumada London waxay gebi ahaanba mamnuucday safarka gobollada Tigray, Amxaarada iyo Gambella. Tigray waxaa laga soo sheegay duqeymo diyaaradaha drones-ka ah oo sababay dhimasho iyo dhaawac, halka duullimaadyadii hawada ee gobolku ay hakad ku jiraan.
gobolka Amhara, dagaal u dhexeeya dowladda iyo kooxaha hubeysan ee Fano ayaa wali socda tan iyo 2023. Gambella-na waxaa ka dhacay iska hor-imaadyo sababay dhimasho iyo xiritaanka iskuullo.
Digniintu waxay sidoo kale khusaysaa dhammaan goobaha u dhow xuduudaha Itoobiya, gaar ahaan 10 KM xadka Eritrea, 20 KM xadka Suudaan, 10 KM xadka Koonfurta Suudaan, iyo 10 KM xadka Kenya marka laga reebo waddooyinka waaweyn.
Sidoo kale waxaa laga digay safarka deegaanada 100 KM u jira xuduudaha Soomaaliya iyo Kenya si gaar ah dhulka Soomaali-galbeed.
Gobolka Oromiya, waxay dowlada Ingiriiska mamnuucday safarka meelo badan oo ay ka mid yihiin Galbeedka iyo Bariga Wollega, Kellem Wollega, Horo Gudru Wollega, iyo waddada weyn ee xiriirisa Addis Ababa iyo Gambella.
Sidoo kale waxaa laga digay Waqooyiga iyo Galbeed Shewa, iyo dhulal u dhow xadka Kenya.
Gobolka Soomaali-galbeed, Ingiriisku wuxuu ka digay safarka inta badan dhulka u dhow xuduud beenaadka Soomaaliya iyo Kenya, gaar ahaan 100 KM gudahood.
Aagga Faafan waxaa laga reebay oo kaliya magaalada Wajaale iyo jidka isku xira Jigjiga iyo Wajaale. Sidoo kale waxaa safar laga digay gobollada Siti, , Jarar, Shabelle, iyo Dollo.
About The Author
