Wararka ka imaanaya dalka Kenya ayaa sheegaya in kooxo hubeysan oo burcad xoolaha dhacda lagu sheegay ay dilal iyo dhaawacyo ka gaysteen qaybo ka mid ah ismaamulka Isiolo ee dalkaasi.
Ciidamada booliska Kenya waxay soo sheegeen inay heleen xogta laba weerar, kuwaas oo lagu dilay ugu yaraan saddex qof oo xoolo dhaqato Kenyaan ah laguna dhaawacay shan xubnood oo kale.
Weerarka 1-aad ayaa laga soo calaamadiyay aagga Bojidare, halkaasi oo kooxda burcadda ahi ku dileen laba qof oo xoolo dhaqato ahaa, waxayna halkaas kaa baxsadeen xoolo isugu jiro ari iyo lo’, kuwaas oo gaaraya 300 oo neef.
Booliska ayaa sheegay inay ku guuleysteen inay soo celiyaan xoolaha la dhacay, balse waxay sheegeen inaysan gacan kusoo dhigin kooxda dilalka ku kacday, waxay sidoo kale sheegeen in isla goobtaas lagu dhaawacay 3 qof oo kale.
Dhacdada labaad ee weerarka ah oo ka dhacay aagga Hola Bule ee isla ismaamulka Isiolo, waxay burcaddu ku dileen hal qof, waxayna halkaas kala baxsadeen 19 neef oo lo’ ah, dhaawacyada weerarkaasi ayaa lagu sheegay laba xubnood oo mid ka mid ah uu yahay sarkaal boolis ah.
Dhacdooyinka dilalka iyo dhaawaca ee burcaddu gaysanayso oo ah kuwa ay u taag waayeen ciidamada kala duwan ee dowladda Kenya ayaa si isku mid ah uga dhaca ismaamullada waqooyiga Rift Valley, Marsabit Isiolo iyo Meru, halkaas oo dad badan lagu laayay, halka xoole badana lagu dhacay.
About The Author
