Wararka ka imaanaya dalka Kenya ayaa sheegaya in ugu yaraan 8 qof oo Kenyaati ah lagu dilay weerar hubeysan oo kooxo burcad ah ay ka gaysteen deegaan dhaca ismaamulka Marsabit ee waddankaas Kenya.
Ilo wareedyo ku sugan ismaamulkan ayaa sheegaya in kooxaha hubeysan oo ka koobnaa 15 xubnood ay kasoo duuleen deegaan lagu magacabo Yell Kurkum oo ka tirsan isla ismaamulkan, ayna soo gaareen deegaan kale oo ka tirsan ismaamulka Marsabit ayna halkaasi ku dileen 8 qof oo Kenyaati ah oo saddex ka mid ah ay carruur yihiin.
Robinson Mboloi oo ah taliyaha Booliska ismamulka Marsabit ayaa xaqiijiyay in koox ka tirsan burcadda Kenyaanka, ah ay toogashadan si bareer ah u gaysteen, xilli uu faraha ka baxay is dilka dadka Kenyaanka ah.
Dadka deegaanka ayaa booliska u sheegay in uu faraha ka baxay amniga guud ee Kenya gaar ahaan midka ismaamulka Marsabit, taas oo sida ay sheegeen salka ku haysa isnacaybka ka dhex jira dadka Kenyaanka ah.
Waxaa dalka Kenya waayadii dambe kusoo badanayay isdilka dadka Kenyaanka ah iyagoo isku beegsada deegaan deegaanka, ismaamulka Marsabit ayaana ka mid ah ismaamullada Kenya ee ay badanaa ka dhacaan isku dhacyada dadka Kenyaanka ah.
About The Author
