Wasaaradda arimaha dibadda dowladda Maraykanka ayaa soo saartay war saxaafadeed digniin ah oo ku socoda muwaadiniinteeda jooga Soomaaliya gaar ahaan magaalada Muqdisho.
Maraykanka ayaa ka digaya weeraro cul culus oo ay qorsheyneyso Xarakada Mujaahidiinta Al-Shabaab, kuwaas oo jawaab u ah sida ay sheegeyso wasaaradda go’aanka Donald Trump ee safaaradda Maraykanka kaga soo rarayo magaalada Talla’biib kuna keenayo magaalada Al-Qudus.
Warka kasoo baxay Wasaaradda arimaha dibadda ee Maraykanka waxaa looga digay muwaadiniinta Ameerikaanka ah iney ka warhayaan xaaladaha amni ee jira, islamarkaana soojeed iyo taxadar badan ay muujiyaan.
Waxay sidoo kale muwaadiniinteeda ugu baaqday iney la socodaan idaacadaha maxalliga ah, si ay u helaan macluumaadyo dhameystiran oo ku saabsan gudaha, waxaana wasaaraddu sheegeysaa in weeraradan ay beegsan doonaa kaniisadaha iyo goobaha dalxiiska.
Maraykanka ayaa sheegaya in Xarakada Mujaahidiinta Al-Shabaab ay damacsantahay fulinta silsilado weeraro ah oo ay u adegsan doonto taktiikaat iyo habab kala duwan oo cusub, waxaana bayaanka wasaaradda lagu lifaaqay nambar teleefan oo ay leedahay safaaradda Maraykanka ee Nairoobi, oo ay la xiriiri karaan muwaadiniinteeda jooga Soomaaliya haddii ay halis dareemaan.
Sida ay sheegtay wasaaradda arimaha dagaalka ee Maraykanka, waxaa Soomaaliya ka jooga ciidamo gaaraya 500 oo askari, waxaana ay u badantahay in ciidamadoodu ay intaas kabadanyihiin, waxaana intaas dheer muwaadiniinta dhar cadka ee la shaqeeya hay’adaha, dowladda federaalka, iyo Shisheeyaha duulaanka soo qaaday, kuwaas oo aad u farabadan.
Digniintan ayaa saameyn ku yeelan doonta muwaadiniinta ka socoda wadamada Shisheeye ee jooga magaalada Muqdisho, waxaana ay kusoo aadeysaa xilli bisha Ramadaan ay nagu soo wajahantahay oo inta badan Mujaahidiintu fuliyaan weeraro qorsheysan oo waaweyn.
About The Author
