Ciidamada booliska dowladda camiilka ah ee Pakistan magaalada Laahoor ee dhacda bariga waddankaasi, xabsi ugu taxaabay Ra’iisul wasaarihii hore ee dalkaas, ninka lagu magacaabo Cimraan Khaan.
Booliska xukuumadda Islaamabaad ayaa tallaabadan xarigga ah qaaday wax yar uun ka dib, markii maxkamada sare ee dalkaas ay Cimran Khaan ku xukuntay 3 sano oo xabsi ah.
Wakaaladda wararka ee Reuters oo soo xiganaysa qareenkii u doodayay Khaan ayaa sheegtay in Cimraan ay ciidanka boolisku ugu dhaceen hoyga uu ka deggan yahay magaalada Lahore ee dhacda bariga Pakistan.
Siyaasigan Pakistaaniga ah ee xabsiga loo taxaabay ayaa daqiiqado ka hor inta aan la xirin soo duubay muuqaal kooban oo uu taageereyaashiisa ugu baaqayay inay ka dhiidhiyaan xukunka xarigga ah ee lagu riday, wallow aysan taasi ka hor istaagin in xabsiga loo dhaadhiciyo.
Booliska Laahoor ayaa sheegay in Cimraan Khaan lagu hayo xabsi amaankiisa aad loo ilaaliyo oo kuyaal magaaladan dhacda bariga Pakistan, saacadaha soo socdana loo duullin doono magaalada caasimadda ah ee Islaamabaad.
Cimran Khan ayaa lagu soo eedeeyay ku lug lahanshiyaha in uu lunsaday waxay ugu yeeraan sanduuqa hadiyadaha dowladda, waxayna sheegtay in si sharci darro ah u iibsaday hadiyado lagu shubay sanduuqa hadiyadaha dowladda, waa sida ay hadalka u sheegtaye.
Taageereyaasha Ra’iisul wazaarihii hore ee dalka Pakistan ayaa billaabay bannaanbaxyo ballaaran oo ay kaga soo hor jeedaan xarigga lagula kacay Cimran Khan, ciidanka booliska ayaana xabsiga u taxaabay qaar ka mid ah dadkii isku soo baxyada ka dhigayay Laahoor.
Hoos Ka Daawo Sawirrada.
About The Author
