Khasaare dhimasho iyo mid dhaawac ah ayaa ka dhashay shil baabuur oo ka dhacay deegaan ka tirsan ismaamulka Siaya ee dalka Kenya, halkaas oo ay ku nafwaayeen dad isku qoys ah.
Inta la hubiyay ugu yaraan ilaa 4 qof oo isku qoys ah ayaa ku dhintay shilka gaari oo si gaar ah kaga dhacay deegaanka Kagoya ee ku teedsan waddada isku xirta Siaya iyo Nyadorera saacadihii lasoo dhaafay.
Ilo wareedyo maxalli ah oo warbaahinta la hadlay waxay sheegeen in shilka uu yimid kaddib markii ay isku dhaceen gaari yar iyo bus nooca ay raacaan ardayda iskuulaadka.
Dad goobjoogeyaal ah ayaa soo sheegay in dadka dhacdadan ku nafwaayay ay kala ahaayeen Aabe iyo carruurtiisa, waxaana maydadka dadka shilka ku dhintay la geeyay cisbitaalka Siaya.
Dhanka kale, khasaare isugu jira dhimasho iyo dhaawac ayaa ka dhashay ka dib markii uu dhisme kusoo dumay deegaanka Bonchari ee ka tirsan ismaamulka Kisii.
Dhacdadu waxaa si gaar ah looga soo tabiyay aagga Suneka ee deegaanka Bonchari, dhismaha dumay na waxa uu ahaa mid gacanta lagu hayay sida ay soo wariyeen ilo wareedyo deegaanka ah.
Ugu yaraan lix xubnood ayaa la xaqiijiyay inay goobta ku dhimateen, halka dhowr xubnood oo kalena lasoo badbaadiyay sida ay sheegtay warbaahinta maxalliga ah.
Dadka dhaawacyada qaba ee laga soo saaray dhismeyaasha burburay, ayaa lasoo wariyay in la geeyay cisbitaalka guud ee Kisii, halkaas oo xaaladdooda lagula tacaalayo.
About The Author
