Wararka ka imaanaya gobolka Shabeellaha Hoose ayaa sheegaya in xoogaga Al Shabaab ay weerar hor leh ku qaadeen deegaan ay ku sugnaayeen maleeshiyaad katirsan dowladda Federaalka Soomaaliya.
Ciidamo aad u hubeysan oo katirsan Al Shabaab ayaa maanta gelinkii dambe weerar ku qaaday isbaaro ay maleeshiyaadka dowladdu dhigteen halka loo yaqaan tobanka Buundo uu u dhaxeeya deegaannada Tixsiile iyo Warmaxan oo dhammaantood hoos yimaad degmada Afgooye.
Ilo wareedyo ayaa sheegaya in ciidamada Al Shabaab ay maleeshiyaadka dowladda Federaalka ka eryeen wadada laamiga ah waxayna fasaxeen gaadiid farabadan oo halkaas ku xayirnaa, waxaa la arkayay gaadiidka oo isaga dhaqaaqaya goobta iyagoo aan wax lacag baad ah siin maleeshiyaadka dowladda.
Dhinaca kale Ciidamada Mujaahidiinta Al Shabaab ayaa caawa maqribkii madaafiic ku weeraray saldhig melleteri oo ciidamada maamulka ‘Jubbaland’ ay ku leeyihiin deegaanka Baar Sanguundi ee duleedka magaalada Kismaayo, madaafiicda ayaa la sheegay in ay dhalisay khasaara dhimasho iyo dhaawac ah oo ciidamada labeegsaday gaartay.
About The Author
