Tiro Madaafiic ah ayaa lagu beegsaday diyaarad Milatari oo nooca Helicopter-ka ah xilli ay ku soo dageysay saldhig Milatari oo ku yaalla duleedka degmada Baraawe.
Diyaaradda oo sahay u sidday Ciidamada shisheeye ee ku sugana gudaha Baraawe ayaa lagu beegsaday madaafiicda xilli ay ku soo dageysay gudaha saldhig ku yaalla deegaanka Ambareeso ee duleedka Baraawe.
Warar xog ogaal ah ayaa sheegaya in madaafiicda qaar ay ku dhaceen meel aan ka fogeyn diyaaradda taas oo keentay in qalqal weyn uu ka dhaco gudaha saldhigga, ugu danbeynna diyaaraddii ay carartay iyadoon wax sahay ah dajin.
Ciidamo fara badan oo ku xoomay diyaaradda si ay sahayada uga dajiyaan ayay soo gaareen khasaarooyin kala duwan, iyadoona la xaqiijiyay ilaa hadda dhimashada 3 askari oo 2 ay yihiin kuwa Soomaalida iyo 1 ka tirsan Ciidamada Uganda.
Diyaaradda Helicopter-ka ayaa si halhaleel ah uga duushay goobta, waxaana fashil uu ku yimid qorshaheedii walow ay Ciidamada shisheeyuhu isku dayeen in saaka ay ammaanka diyaaradda sugaan oo si nabad galyo leh ay sahayda u soo dajistaan.
Ciidamada Shisheeyaha ee ku sugana gudaha degmada Baraawe ayaa hore uga caagay in sahaydu ay ugu timaado dhulka sababo ku aaddan weerarrada Kamiinada iyo qaraxyada, waxeyna dhawaan u weecdeen dhanka Badda, laakin markab sahay u siday ayaa isaguna la duqeeyay waqti uu ku soo xiranayay dekadda Baraawe.
Waxey maanta isku dayeen dhanka Cirka iney u weecdaan oo sahayda lagu soo gaarsiiyo diyaarad, laakin iyaduna ma guuleysan, sidaas darteed waxey u muuqdaan Ciidamada shisheeye ee Baraawe jooga kuwa go’doon ka ah Bad, Birri iyo Cir, haddii ay sidaasi sii socotana waxey sii kordhin doontaa culeysyada hadda heysta.
About The Author
