Xilli ay sare usii kacayaan xaddiga weerarada Xarakada Al Shabaab ay ka fulinayso gobollada dhaca Koonfurta iyo bartamaha dalka Soomaaliya ayaa walaac laga muujinayaa sida DF-ka ah ula wareegi karto ammaanka dalka marka ay ciidamada shisheeye dib ugurasho bilaabaan.
Mas’uuliyiin horay ulasoo shaqeeyay DF-ka islamarkaana galaangal ku leh siyaasadda Villa Somalia ayaa ka shanqariyay in xukuumadda Kheyre ay ku fashilantay sugidda ammaanka xarumaha dowladda.
Cabdi Salaam Yuusuf Guuleed oo horay usoo noqday taliye ku xigeenka Sirdoonka dowladda Federaalka ayaa sheegay in Al Shabaab ay dagaalka dhanka amniga ah uga horrayso xukuumadda Kheyre isagoo soo hadal qaaday dhacdooyinkii ugu dambeeyay ee ka dhacay hareeraha madaxtooyada.
hadalkan ayuu Guuleed ka sheegay barnaamij dood ah oo ay qabatay Idaacadda BBC-da laanteeda Afka Soomaaliga waxaana barnaamijkaas diiradda lagu saarayay arrimaha ammaanka.
“Qaraxyadii ugu dambeeyay marka laga saaro kii Hotelkii Saxafi, waxay ka dhacayeen Sayidka illaa Hooyooyinka ama Tiyaatarka, taasoo muujineysa in dowladda Soomaaliya ay soo koobantay”ayuu yiri Taliye ku xigeenkii hore ee Nabadsugida.
Wuxuu sheegay in weerarada Al Shabaab ee magaalada caasimadda ah ay noqdeen kuwa aan laga hortagi karin isagoo ku dhaliilay nidaamka Farmaajo madaxda ka yahay mid ka baxay dhammaan ballan qaadyadii uu sameeyay.
Sarkaalkan ayaa soo hadal qaaday sida xoogaga Al Shabaab ugu suurtagashay in ay cuuryaamiyaan dhaq dhaqaaqyadii ciidamada shisheeyaha AMISOM oo ah awoodda kaliya ee DF-ka ku difaacda magaalada Muqdisho.
“Haddii maanta dowladda Federaalka wada shaqeyn amni kala dhaxeynMaamul goboleedyadii, haddii Ciidamada AMISOM howlgeli karin oo ay ka soo baxayaan xerooyinkooda, haddii sahaydii iyo socodkii ciidamada go’an yahay oo Baraawe illaa Muqdisho wax isu gudbi karin, ama Jowhar iyo Muqdisho si qatar ah lagu gudbayo, intaas waxay ku tusayaan in is bedel weyn oo amniga jiro ma aysan gaarin heerkan 10-kii sano u dambeeyay”ayuu yiri C/salaan Guuleed.
Warkan kasoo yeeray taliye ku xigeenkii hore ee Nabad sugidda ayaa imaanaya xilli isbuucii lasoo dhaafay ay xarakada Al Shabaab laba weerar ka fulisay albaabka madaxtooyada islamarkaana ay wali Muqdisho kasii socdaan qaraxyada iyo dilalka lagu ugaarsanayo saraakiisha dowladda Federaalka.
Halkan ka degso caddeymaha Taliye ku xigeenkii Sirdoonka ama hoos daawo
About The Author
