Warar faah faahsan ayaa laga helayaa duqeymo ay diyaarado dagaal ugeysteen dad shacab ah xilli ay ku safrayeen deegaan katirsan gobolka Jubbada Hoose ee dhaca Koonfurta dalka Soomaaliya.
diyaarado dagaal oo loo maleynayo in leedahay dowladda Mareykanka ayaa xalay fiidkii duqeeyay gaadiid dad shacab ah la socdeen oo marayay deegaan ku dhow degmada Afmadoow.
illaa sedax gaari xamuul ah oo kasoo amba baxay magaalada Kismaayo ayaa duqeymo lakulmay xalay saacaddu markii ay ku beegneed 8:00 fiidnimo.
Ugu yaraan hal qof oo shacab rayid ah ayaa ku shahiiday duqeyntan halka uu dhaawac kasoo gaaray qof kale oo shacab ah kaas oo dhaawaciisa la sheegay in uu meel dhaxaad yahay waxaana loola cararay isbitaal kuyaal magaalada Kismaayo.
Wararka ayaa intaas ku daraya in gantaallada ay tuurayeen diyaaradaha dagaalka ay waxyeello gaarsiiyeen gaadiidka labeegsaday iyo hantidii ku rarneed oo ay kasoo daabuleen dhanka magaalada Kismaayo.
Duqeymaha lagu gummaado dadka shacabka waxaa gobollada Jubbooyinka badanaa ka geysta diyaarado ay leeyihiin dowladaha Kenya iyo Mareykanka, waana markii 2-aad oo duqeymo shacab lagu beegsado ay ka dhacaan duleedka Afmadoow.
About The Author
