Isbahaysi ay ku mideysanyihiin siyaasiyiinta mucaaradka dalka Kenya, ayaa cambaareeyay weerar ciidanka ammaanka ee dowladda Kenya ku qaadeen hoggaamiyeyaasha mucaaradka iyo taageereyaashooda, kuwaas oo isku soo bax siyaasadeed oo ka dhan ah dowladda qabanayay.
Isku soo baxa oo Sabtidii ka dhacay waddada xiriirisa Gitaru iyo Kikuyu ee ka tirsan ismaamulka Kiambu, ayaa waxaa hoggaaminayay siyaasiyiin caan ah oo mucaaradsan siyaasadda William Ruto, oo ah madaxweynaha Kenya.
Waxay sheegeen in weerarka ciidamada ammaanka ee lagu hakiyay isku soo baxa ka dhacay Kikuyu uu ahaa mid si ula kac ah loo qaaday oo halis wayn lagu geliyay nolasha hoggaamiyeyaasha mucaaradka.
Mucaaradka isku soo baxa dhigayay waxaa hoggaaminayay siyaasiga lagu magacaabo Kalonzo Musyoka, wuxuuna sheegay in dhacdada ay u dhiganto isku day dil ah oo la doonayay in hoggaamiyeyaasha mucaaradka lagu soo afjaro.
Ciidanka ammaanka ee loo adeegsaday weerarka ayuu ku eedeeyay inay si cad dhaaf ah u adeegsadeen awood ciidan, ilo wareedyo kale, ayaa sheegay in ciidankaasi rassaas, sunta dadka ka ilmaysiisa iyo rassaas kale oo caag ah ku fureen gaadiid kolonyo ah oo ay saarnaayeen Kalonzo Musyoka, Rigathi Gachagua iyo Eugene Wamalwa oo ah hoggaamiyeyaasha mucaaradka ee dalka Kenya.
Mucaaradku waxay warbixintooda ku sheegeen in weerarka uu sababay inay kala jabaan, qayb ka mid ah siyaasiyiinta mucaaradka ah ayay sheegeen inay gaareen Kikuyu, halka qayb kalena loo weeciyay Mai Mahiu, ciidamada ayaa sidoo kale lagu eedeeyay inay si joogto ah u eryanayeen kolonyada, iyaga oo ku ridayay rasaas nool iyo sunta dadka ka ilmeysiisa intii ay daba jireen.
William Ruto, oo ah madaxweynaha dowladda Kenya, ayaa xilligan wajahaya mucaaradad aad u xooggan, maalmo ka hor ayay ahayd markii la afduubtay sarkaal ka tirsan mucaaradka ku xigeenna u ah Rigathi Gachagua oo ka mida hoggaamiyeyaasha isbahaysiga mucaaradka Kenya.
About The Author
