Waaxda dembi baarista dowladda Kenya, ayaa shaacisay in gacanta lagu soo dhigay ilaa 4 qof oo loo haysto tuhunka dil iyo afduub lagula kacay nin u dhashay dalka Ingiriiska, kaasi oo la dilay sannadkii hore ee 2025-kii.
Dhacdadan oo ka dhacday meel qiyaastii 96.5 km u jirta magaalada Nairobi ee caasimadda dalka Kenya, ayaa lagu dilay Campbell Scott Allistair, kaasi oo ahaa ganacsade u dhashay dalka Ingiriiska.
Kiiskan ayaa la diiwaan geliyay 24‑kii Febraayo sanadkii hore ee 2025-kii markii 17-kii bishaasi la waayay ninka ganacsadaha ah ee u dhashay dalka Ingiriiska, waxaana 24-kii Febraayo maydkiisa laga helay kaynta Makongo oo 60 mayl u jirta Nairobi.
Waaxda dembi baarista Kenya, ayaa ugu dambayn waxay soo bandhigtay natiijada baaritaanno ay kiiskaasi ku sameeyeen, waxaana dhacdada loo soo qabtay ilaa 4 qof, kuwaas oo wajahaya eedda la xiriirta afduubka iyo dilka ganacsadaha Ingiriiska iyo dhac hubeysan oo loo gaystay dad kale.
Waaxdu waxay sheegtay in howlgal ay sameeyeen ay kusoo qabqabteen Bernard Mbusu, Isaac Kinoti Kobia, Evans Muthengi Mutaki iyo Kelvin Mwangi Njoroge, raggan oo ah tuhmenayaasha dilka iyo afduubka ayaa laga qabtay guri dabaq ah oo kuyaal deegaanka Ukunda ee ka tirsan Kwale.
Kaambel Iskoott Alistaar oo ahaa nin 58 jir ah, ayaa mar qura la waayay xilli uu ballan kulahaa Hotel kuyaal xaafadda Westlands ee magaalada Nairobi, halkaas oo uu kula kulmi lahaa saaxiibadiis, balse maalmo kadib afduubkisia ayaa maydkiisa meel kayn ah laga helay.
About The Author
